Имрӯз, 16 октябр, сафари кории Сарвазири мамлакат Қоҳир Расулзода ба вилояти Хатлон бо шиносоӣ аз рафти сохтмони бинои истиқомаnии 48-ҳуҷрадор дар маркази ноҳияи Қубодиён идома кард.
Бинои аз 5 ошёна ибора буда, барои хизматчиёни давлатӣ пешбинӣ шудааст. Маблағгузорӣ аз ҷониби Дирексияи сохтмонии иншооти Ҳукуматии дастгоҳи иҷроияи Президенти Ҷумҳурии Тоҷикистон сурат гирифта, корҳои пудратиро дар иншооти мазкур ҶДММ «Парвиз-92» ба уҳда дорад.
Зимни боздид аз маҳалли сохтмони беморхонаи бисёрҷабҳаи иборат аз 200 кат, ки бунёдаш тибқи қарори Ҳукумати Ҷумҳурии Тоҷикистон аз 25 сентябри соли 2018 ва қарордоди миёни Тоҷикистону Ӯзбекистон аз августи соли 2018 оғоз гардидааст, Қоҳир Расулзода бунёди иншооти мазкурро далели навбатии муносибатҳои дӯстона ва шарикии стратегии ду кишвари ҳамҷавор номид. Масоҳати умумии замини ҷудогардида барои ин маҷмааи тиббӣ 5 гектар буда, он аз ҷониби Ҷумҳурии Ӯзбекистон маблағгузорӣ карда мешавад.
Дар деҳаи Ҳаваскори Ҷамоати деҳоти “Тахти сангин” Сарвазири мамлакат Қ. Расулзода ва раиси вилояти Хатлон Қ. Ҳакимзода аз гармхонаи деҳқони овозадор Ҳоҷӣ Тулқин, ки барои парвариш намудани помидор сохта шуда, доимоамалкунанда мебошад, инчунин аз парваришгоҳи чорвои калони шохдори хусусии сокинони деҳа дидан намуданд.
Боздид аз рафти корҳои сохтмонӣ дар бинои таълимӣ ва хобгоҳи мактаб-парваришгоҳи ноҳияи Қубодиён яке аз мақсадҳои дигари сафари корӣ маҳсуб мегардид. Ба Сарвазири мамлакат иттилоъ доданд, ки мактаб-парваришгоҳ барои 260 ҷойи хонанда бо хобгоҳи дорои 100 кат пешбинӣ шудааст. Бино аз 2 ошёна иборат буда, бо маблағгузории Фонди Саудии рушд дар деҳаи Ҷангали Ҷамоати деҳоти “20-солагии Истиқлол” бунёд мегардад.
Дар деҳаи Қӯшачинори ҳамин ҷамоат Қоҳир Расулзода ва раиси вилоят Қурбон Ҳакимзода дар маросими ифтитоҳи кӯдакистони хусусии «Суғдиёна», ки аз ҷониби соҳибкор Маъруф Раҳмонқулов бунёд гардидааст, иштирок намуданд. Сарвазири мамлакат ба сифати корҳои сохтмонӣ баҳои хуб дода, ҷиҳати корҳои ободонии атрофи иншоот тавсияву дастурҳо дод.
