Бахшида ба Рӯз парчами давлатӣ дар маркази ноҳия як қатор чорабиниҳо баргузор гардид.
Сокинони касбу кори гуногуни ноҳич бо нишони эҳтиром ба муқаддасоти миллӣ ва бо шукргузорӣ аз фазои сулҳу ваҳдат роҳпаймоии идона баргузор карда, ба ин тариқ муҳаббати худро нисбат ба муқаддасоти миллӣ, ифтихори ватандорӣ ва сулҳу субот арзёбӣ намуданд.
Ҳамчунин ба ифтихори ин ҷашни милли дар толори қасри фарҳанг маҷлиси тантанавӣ баргузор гардида, раиси ноҳияи Қубодиён Зафар Файзуллозода тамоми сокинони ноҳияро ба муносибати Рӯзи парчами давлатӣ табрику таҳният намуда, эҳтиром ба арзишҳои маънавӣ ва муқаддасоти миллиро яке аз омилҳои муҳими пойдории давлати соҳибистиқлол унвон кард. Номбурда зимни баромади худ изҳор дошт, ки парчами имрӯзаи давлатӣ яке аз рамзҳои муҳими истиқлолияти миллӣ ва давлатдории муосири мо, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷикистон мебошад.
Раиси ноҳия дар идомаи суханронии худ қайд намуд, ки парчами имрӯзаи давлати мо бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар натиҷаи омӯзиши амиқи таърихи давлатдории тоҷикон, анъана, расму оин ва рамзҳои миллӣ омода гардида, бо назардошти майлу иродаи мардум қабул карда шудааст. Ба гуфтаи раиси ноҳия нақши Иҷлосияи XVI Шӯрои Олии Ҷумҳурии Тоҷикистон дар қабул гардидани парчами давлатии кишвар басо муҳим мебошад. “Дар он Иҷлосияи таърихӣ Сарвари тозаинтихоби давлати тоҷикон ҳамчун рамзи эҳтиром ба Ватан ва миллати хеш Парчами давлатии Ҷумҳурии Тоҷикистонро ба дида молида, сипас ба иҷрои вазифаи муққаддаси худ шурӯъ намуд”, гуфт раиси ноҳия.
Гуфта мешавад ба муносбати таҷлили Рӯзи парчами давлатӣ тамоми ноҳия симои идона ба баркарда, сокинони ноҳия бо нишони эҳтиром ба Парчами давлатӣ чорабиниҳо доир намуда, онро ҷињати бедор сохтани худшиносиву худогоҳии тамоми қишрҳои аҳолӣ дар кӯчаҳои марказии ноҳия ва пештоқи ташкилоту муассисаҳои ноҳиявӣ, кӯчаву роҳравҳо, ҷамоатҳои шаҳраку деҳот, хонаҳои истиқомативу биноҳои маъмурӣ насб намуданд.
Ҳамзамон ба ифтихори ин санаи муҳим дар толори қасри фарҳанги ноҳия барномаи идона консертӣ баргузор гардида, сокинон бо рӯҳу илҳоми тоза ва табъи идона онро тамошо намуданд.
Ба муносибати Иди парчами давлатӣ дар саҳни қасри фарҳанги ноҳия намоиши ҳунарҳои мардумӣ ва маҳсули кори дасти ҳунармандони ноҳия ба маърази тамошои иштирокдорон гузошта шуд.
