Тарғиби дастовардҳои солҳои соҳибистиқлолии кишвар, арҷ гузоштан ба таъриху фарҳанги миллӣ, пешгирии ҷавонон аз шомилшавӣ ба ҳизбу ҳаракатҳои ифротгаро ва даст задан ба ҷиноят. Бо ин мақсад гурӯҳи тарғиботии мақомоти иҷроияи ҳокимияти давлатии вилояти Хатлон таҳти роҳбарии муовини раиси вилоят Хидирзода Махфират Умар дар толори қасри фарҳанги ноҳия бо фаъолон ва сокинон вохӯрӣ доир намуд.
Зимни баромади худ муовини раиси вилоят Махфират Хидирзода изҳор дошт, ки баҳри пешгирии ҷавонон аз шомилшавӣ ба ҳар гуна ҳизбу ҳаракат бояд тамоми ҷомеа фаъол бошад ва корҳои фаҳмондадиҳӣ дар ин робита ҷоннок карда шавад.
Раиси ноҳияи Қубодиён Зафар Файзуллозода дар навбати худ қайд намуд, ки имрӯз ҳар як сокини ноҳия бо эҳсоси амиқи ватандӯстӣ ва масъулиятшиносӣ ба давлату ватани аҷдодӣ барои ҳимояи он аз таҳдиду хатарҳои ҷаҳони муосир ва ҳимояи арзишҳои миллӣ талош намуда, баҳри ободӣ ва гулгулшукуфии ватан бо маром фаъолият доранд.
Бо ёдоварӣ аз ҳодисаи нохушӣ марбут ба қатди сайёҳони хориҷӣ дар ноҳияи Данғара раиси ноҳия Қубодиён зикр намуд: “Фаъолон ва намояндагони аҳли ҷомеаи ноҳияи Қубодиён амали номатлуби бадбинона ва барқасдонаро, ки нисбат ба сайёҳони хориҷӣ ба амал омад, маҳкум намуда, минбаъд низ беш аз пеш ҳушёриву зиракии сиёсӣ нишон хоҳанд дод ва дар атрофи Пешвои муаззами миллат муҳтарам Эмомалӣ Раҳмон боз ҳам зичтар муттаҳид гардида, дар роҳи амалӣ сохтани нақшаву барномаҳои давлат ва Ҳукумати Ҷумҳурии Тоҷикистон ҷиҳати рушди бештари Тоҷикистони азиз ва боз ҳам беҳтар сохтани сатҳи зиндагии мардум тадбирҳои заруриро амалӣ менамоянд”.
Дар фарҷоми нишаст аз ҳаёти ҷавононе навор пахш карда шуд, ки аз гумроҳӣ ба гурӯҳҳои ифротгаро пайвастаанд ва акнун бо изҳори пушамонӣ роҳи ватанро пешгирифтаанд. Мақомоти ҳифзи ҳуқуқ бо назардошти пушаймониашон онҳоро авф намуд.
